අපි මාකටින් ඉගෙන ගමු

වටුවා මාකටින් ගැන මෙලෝ හසරක් නොදනී. නමුත්, මාකටින් ගැන දත යුතු සියල්ලද දනී. වටුවලා එසේය. වානිජ විෂය හදාරන නංගිල මල්ලිලාට විෂේශයි. අද පාඩම, 'මාකටින්'.

සබාවෙන් අවසරයි. මා මෙතෙන්ට පැමිණියේ කතාවක් කිරීමටයි.

ජීවිතය යනු මාකටින් ය. සියල්ලම පාහෙ මාකටින් ය. ජීවත් වීමට සහ පැවතිමට නම් අපට අපවත්, විටෙක අනුන්වත් මාකට් කිරීමට සිදු වෙයි.හොදම මාකට්කරුට හොඳ තැනක් ලැබෙන්නේය.මාකටින් විවිධාකාරය. සමහරු තමුන්වම මාකට් කරති. සමහරු අනුන්ව මාකට් කරති. සමහරු දුකත් සමහරු සතුටත් මාකට් කරති. හිඟන්නා නැති දේ මාකට් කරයි. ධනවතා ඇති දේ මාකට් කරයි. සමහරු ආදරය මාකට් කරති. සමහරු විරහව මාකට් කරති. දිනුම පැරදුම පවා මාකට් වෙයි. සමහරු හැකියාව මාකට් කරති. විටෙක නොහැකියාව මාකට් වෙයි. සමහරු ඇත්ත මාකට් කරති. සමහරු බොරුව මාකට් කරති. සමහරු මාකටින් නොවීම මාකට් කරති. සමහරු මාකටින් වීම මාකට් කරති. සමහරු 'මාකටින්' පිළිබඳ මාකට් කරති.

මාකටින් කිරීම හෝ වීමේ අරමුණු වෙසෙසිය. මූල්‍යමය විය හැක. හුදු ආත්මතෘප්තිය පමණක් විය හැක. පලිගැනීමට විය හේක. ප්‍රසිද්දියට විය හැක.සමහරු ලයික් උදෙසා මාකට් කරති. සමහරු කමෙන්ට් උදෙසා මාකට් කරති. සමහරු ජීවත්වීම උදෙසා මාකට කරති. සමහරු මරණය උදෙසා මාකට් කරති.ජීවිතය යනු මාකටින්ය. සියල්ලම මාකටින්ය. කෙනෙක් සිනහ වෙන්නේද, අඬන්නේද, දුක හිතන්නේද සතුටු වෙන්නේද, කතා කරන්නේද, වෛර කරන්නේද, අවංක වන්නේද වංක වන්නේද සියල්ලම මාකට් කර ගැනීමටය.

'මාකටින්' කුලකයෙ, 'ජීවිතය' යනු එක් උපකුලකයක් පමණක්ය. එම උපකුලකයේ අවයවයක්ව සිටින තාක් තමුන්ව හෝ අනුන්ව මාකට් කළ යුතුය. යම් හෙයකින් කුලකයෙන් ඉවත් වන්නේ නම්, අන් සියල්ලෝම ඔබව මාකට් කරනවා ඇත. මාකටින් වල අරුමය එයය. එහි සුන්දරත්වය එයය.වරක් මාකට් වී නම් සදටම මාකට් විය යුතුය. දැනුවත්ව හෝ නොදැනුවත්ව, කැමතිව හෝ අකමැතිව එය සිදු වෙයි. මාකටින් වල සාර්වත්‍ර නියමය හා එකම තියරිය එයයි.

අවස්ථා ද්විත්වයක් හැරුණු කොට ඔබට ඔබේ ජීවිතයේ ඕනැම අවස්තාවක් මාකට් කරගත හැකිය. එහෙත් ඔබ හැරුනු කොට අන් සියල්ලම යතෝක්ත අවස්තා ද්විත්වය රිසි රිසි පරිදි මාකට් කරති. එනම් ඔබේ (හෝ මගේ) ඉපදීම හා මරණයයි. එය මාකටින් වල ස්වභාවයයි.

මගේ කතාව අවසානයි. අසා සිටි ඔබ සැමට ස්තුතියි.